Yasmin's Mirror

اتفاقيات السلام للشرق الاوسط في بيتنا تنص على انهم بيصلحون فطور خفيف و رز مندي مما يعني الي فهمته من كلكة خفيف ومندي انه تمر ولبن و قهوة …
فكانت سعادتي لاتوصف شبه اجازة

للاسف امس كان من الايام المعارك حامية الوطيس
في شغلي
بديت اشتغل من الساعة ٧ الصباح بعد ما اخذت غفوة بعد الفجر
جلست اترجم قوائم اسماء و لكثرة العجز ترجمتها بقوقل وقعد اراجعهم
و كانت تراجم قاتلة خخخ ماحصلت ولا استوت
ثم بديت بالثيم
و لشدة حماسي كنت بتشقق لان الثيم وصل اخيرا من السلايسر
وخلال ما انا احوله الى ثيم للبرنامج بشكل صدقي “كني ساحرة”
في نص السالفة لاحظت ان الثيم من شدة ثباته الفوتر ما يتحرك من مكانه لو على قطع رقبته !
يخرب بيتك من سلايسر وش معلمه عشان ما يتحرك من مكانه!!؟!
شدة ثباته انه ما ينزل ولا يرقى و لو مر عله نصوص يقعد فوقهم و اهم يمرون من تحته
و اقعد احاول فيه ياولد الناس انزل بس ماطاع كانه واحد يبي ينتحر و نقنعه بالتبطيل

و بعد مراوغات و لف و دروان و كر وفر
قررت اهدم عليه البنايه الي واقف عليها

و صرت مثل “كنك يابو زيد ماغزيت”
لاني رجعت اعيد شغل ابو سلايسر اطوع الاخ “فوتر” للتعاون معي (اعيد تاهيله)
عله يعي الحياة بشكل طبيعي و يسمع كلام الي اكبر منه
ماحسيت بالوقت الا الساعة ٤الا ربع و اختي و زوجة اخوي الكبير ينادوون انزلي للمطبخ

اناما استوعبت وش مطبخة فطنشتهم الين عصبوا علي
لما نزلت قلت وش فييه ؟!؟&@”£
قالوا كان قعدتي بعد شوي!
قلت مو اتفقنا ان الفطور رز و خفايف وش قلبكم
؟
قالوا خفايف يعني سمبوسة و سندوتشات
بعدين ليه توك تنزلين ؟! قاعدة تلعبين لحد الان ؟!

اه بس منكم!
العب ، قاعدة اشتغل بعدين بما ان اليوم كل الحريم فيه ارحموني شوي اخلص شغلي
قالوا خلاص مانبيك
( ادري مب مصحين الهوانم الي عندنا عشان يساعدونهم في الفطور ) و لان قلبي ما يطاوعني اخلي هالثنتين يكرفون لحالهم قررت اجلس و اصلح معهم الفطور الخفيف خخخخخخ مدري من وين جا خفيف بس بمشيها !

.

امس الظهر الساعة 11 كنت مندمجة اشتغل  على موقع و متحمسة لاقصى درجة فجاة دق جوالي

ناظرت فيه لينه رقم و بما انه وقت دوام رديت عليه

- نعم  ..

- هلا ياسمين

- اهلين

- ياسمين وينك فيه تو بيشنتس ينتظرونك في العيادة

( هنا فاصل خخخخخ انا وجهي صار كذا )

- لحظة ! لحظة ! معليش  وش السالفة ؟؟! وش بيشنته؟!

- يؤ سوري سوري ما كنت اقصدك

(و سكرت الخط )

.

ههههههههههههههههههههههههههههههههههههههههههههههههه

انا تمصعت ضحك

اجل بيشنت ينتظروني ههههههههه الله يرحم الي بينتظرني

.

بس عرفت السالفة بسرعة وش القصة

انا اعرف 5 هاي جين من مستشفى العسكري  وحده منهم اسمها ياسمين

و  هذي وحده من الاربعة الباقين شكلها زميلتها و بما ان رقمي مسجل عندها شكلها من العجلة دقت علي

هم هكذا اجادوا فن الوخز

وخز للمشاعر لا للجسد

احترفوها كحرفة

فاستخدموها لتعذيب من حولهم

ليس لذلك التعذيب أنين و لا آهات

فقط….

عليك استبدال أنينك و تأوهك بابتسامة

حتى لو كانت مصطنعة !

هكذا هي التعليمات

عندها ستصبح مشاعرك

كـ ساق شجرة معمرة

مليء بالثقوب مليء باحساس وحيد

ليس  إلا

أنك لا تجيد تطبيق ذلك الفن على من حولك !

————————————————-

امم التصميم قديم جدا جدا جدا في عام 2004

و دقته رايحه فيها لان هذي نسخة من ملف بي دي اف عندي

النسخة الاصلية طارت مع تصاميم و اشيائي السابقة ..

يالله كيف الايام تمر و كيف تحولنا من اشخاص لا شخاص اخرين ..

صحيح اني مازلت اعاني من ها المشكلة لكن اعتقد ان الايام تصقلنا ،و تعلمنا دروس في التعامل مع الناس ..

تذكرنا ان الثقة صعبة و العيش بدون ثقة اصعب ..

كمن يرتقب قنبلة موقوته يعرف انها في لحظة ما ستنفجر

فلا مجال للامان في ساحتها .. و افتراض الامان امر ميؤوس منه في كثير من الحالات …

,

اعتقد الان كملت اسبوع و زيادة من يوم استخدمت iPhone

اكثر شي حبيته و استخدمته فيه لعبة angry birds

اللعبة مجنونة بما تعنية الكلمة فكرتها و تنفيذها و حتى المؤثرات حقتها

و متصدره اللعبة الاولى في Apple Store

ههههه

في البيت اخواني لان كل واحد معه اي فون او اي باد او اي تش

الكل مركبها ويلعبونها

محمد ولد اخوي عبدالله مغرم في اللعبة لدرجة انه يمسكني قبل عهد الاي فون حقي عشان يوريني قصتهم مره متعاطف معهم

هذي قصتهم

مختصرها

طيور مبسوطين على بيضهم و شدة خوفهم عليه انشغلوا يصفقون ناموسه قربت من البيت

و لما لفوا وجيهم لقوا الخنازير سرقت البيض

و تبدا لمغامرات من هنا

المطلوب منك كلاعب تطلق ” تنبط ” العصافير من ” نبيطة ” تصوب بهم الخنازير

المراحل مره مره كثيرة

و ممتعه في كل مرحلة يصيرون الخنازير متخبية بطريقة يصعب تطلق عليها مباشرة فلازم تصوب زين + تعرف نقطة الضعف في المكان الي مختبيه فيه

اكثر شي عجبني فيها الارتدادات و الميلان لما ينظرب شي و قوة الظربات كلها عمليات حسابية و شغل  مب طبيعي

زاوية الانطلاق حقت العصفور و كيف ينزل على الارض مره مجنووووونه

انا صرت مدمنة عليها و متحمسه معهم بقوووة  لدرجة بعض الاحيان اعصب وابدا اهاوش و اتوعد الخنازير خخخخخخخخ

اختي امس خذت الجوال مني وقت العصر يوم نطبخ الفطور تقول انتي منهبله ما عاد تشتغلين كل خمس دقايق تلعبينها

و ما رجعته لي الا على الاذان

بس جد ممتعه

درست في مادة الاقتصاد الاسلامي عن تكدس الموظفين في عمل يقوم به شهص واحد لا يحضرني اسم المصطلح ولكنه كن من الاشياء السلبية
مايحدث الان في اغلب القطاعات يمثل هذا الشي
فالوضع اما ان احدهم يعمل و البقيه تتفرج او ” القدر المشروك يحترق”. تضيع المعاملات و الاوراق و تدب ” الدجة” بين الجماعة لدرجة ان الواحد ” يتحسف” يشتغل والباقين يتفرجون ( ايضا هذا حال الاعمال الجماعية عندنا ونحاسب في النهايه بنفس التقدير

المشكلة حين يكون العمل كافي تماما لموظف واحد و بالمقابل هناك اعمال تجد فيها شخص يقوم بعمل ٤ موظفين و هو ما ينعكس سلبا على انتاجه

هذه الايام تعمل معي موظفة فهمت في البداية انها لفترة و ستعود لقسمها ” مافهمت سالفتهم ”
المشكلة الكل حريص على ان تكون معي (بنجيب فلانة تساعدك ، بنقولهم تجي تداوم هنا معك ب ب ب ) في البداية صدقت نفسي و قلت ” واو يابنت لها الدرجة انتي مهمة جايبين من يفزع معك”

حضرت وتقابلنا
هي اخلاق و يبدو انها شغيلة لكن انا مادري وش موقعها الاعرابي لانهم قالوا لي ” لاتعاملينها كنانك مديرة عليها اطلبي المساعدة منها ”
هههه ماعرفوا ان كلمة مساعدة صعبة عندي و الطلب كمديرة اصعب ايضا ليس لديها مهارات تقنية يعني صار فيه عندي ٢ هذي و الثانية الي في اجازة متساوين ( و ما اعطتني مسماها الوظيفي ابدا مع ان لها حسب كلامها ١٦سنة بالكلية)
اممم
انا فهمت ان الوضع مؤقت و فشرحت لها المطلوب و قلت كمليه من مقرك السابق لان ماعندي مكتب !
الين توصل سياراتنا جلست تقص لي قصتها بهالمكان . انها كانت هنا ثم فجاه تضايق زوجها من الاختلاط و طلب منها تنتقل للفرع الثاني او الاستقالة و انها لما طلبت الاستقالة خيروها بالذهاب للفرع الثاني كحل بديل
و انتقلت و لانه لايوجد نفس ادارتها قرروا يضيفونها كمساعدة للسكرتيرة الوكيلة لكن السكرتيرة كما يبدو ما كانت تحتاج مساعدة ! فمرت السنوات واهي جالسه بدون فائدة بالمكان حتى عرضوا عليها مشرفة النشاط صارت تشتغل حتى برا البيت لان طبيعة عملها تتطلب كذا بعدها الوضع ماصلح لزوجها +بيتهم صار اقرب للمكان الي اشتغل فيه فتمنى”ليتهم ينقلونك هنا اريح ماهندك شغل بالعصر واقرب لبيتنا ”
كذا انتهت قصتها …..

انا مادري وش السالفة كل يوم يدقون هي داومت معك هي جات خي اشتغلت هي هي هي

لكن بعدين فهمت !!!
لما سالت قالوا انها بعد العيد بتصير معك !
اها ! طب وش فرقها عن الثانية ؟ الي عندها مكتب هنا ؟
هذيك مو معك خلاص بتشتغل شي ثاني
اها ! اوكي مو مشكلة

فهمت الان

من العاقل الذي لم يفهم القصة ؟!
زوجها عنده جنية الامنيات ،امانيه تتحقق !!
تمنى تروح لل م وراحت ،تمنى تروح لل د و راحت
مادري هل تمنى انها تشتغل شغل خفيف والا لا ؟!؟
ههههه مسكين زوجها مافهمت امنيته انه يبيها قريبه من البيت خاصة برمضان وانا رجعتها للفرع الثاني لما قلت لها كملي شغلك مناك !!!

على كل لم يحدث شي سوى انه لايوجد مرتبه وظيفية مناسبه لعملي لذا هاجسهم كيف نحطك !؟
ههههههه
الموضوع مضحك اكثر من اللازم لما سالوني تعرفين احد هنا؟
كانهم يقولون لي تعرفين جنية ؟

لا والله ما اعرف
للاسف ما عندي جنية الامنيات

الشهر الماضي مر علي بسكوون
كمل الخمول الي مصاحب راسي لدرجة يبدا الايوم وينتهي وانا ما فكرت فيه ولا تفرق معي الليل و النهار كل الموضوع ايام تمر ! وتولي ماعندي مشكلة معها هل هو ربوع ولا سبت كلهم بطعم واحد

كان توبك وحدة من البنات بالماسنجر ” عمل مضني خير من فراغ قاتل ”
هههه اول ماشفته ضحكت تذكرت اننا ناس تحب الكرف و تعودت عليه ، و نحس بازمة لحسينا بالفراغ
مادري كيف كنا نكرف بجد و اجتهاد و ساعات النوم القليلة بعض الاحيان ما تتعدى ٤-٥ باليوم متقطعة ٢ باليل و الباقي بالعصر
و كيف يمر اليوم و ننام ونصحى واحنا نفكر بحلول و طرق لكتابة الاكواد و ينقطع الارسال بنا مع الناس و احنا نفكر و نحاول خلق مكان للتفكير الي ” اقرف عيشتي ”
الان بعد كل هالايام الي مريت فيها وانا في سبات
وخلايا مخي النائمة في العسل ههه
قدامي مشروع كبير و لازم اثبت فيه حتى النهاية
و استخدم طاقاتي المخزونة و اودع حركات النوم المتواصل لان النوم صار بريك تفكير صامت ” عدنا لمعركة حلول العمليات ”
ومر اسبوعين الان و انا احاول جاهدة زيادة معدل عملي المتواصل دون انقطاع او تحرك من الجهاز من ٥-٦ساعات يوميا لوقت اطول لكن للاسف زيادة هالفترة يعني نشاءة اوجاع الظهر و الصداع المستمر و لان الوقت ضيق في رمضان و مطبخ امي يطالب حضوري يوميا حتى لو كنت شبه نايمة الا في حالات المرض خخخ
اسال الله ان يبارك لي في وقتي و ايامي و ييسر امري

الله يغفر لنا  و يتوب علينا .

انتصف الشهر و بدا تفكيري يدور ويلف مع حفلة العيد

كل سنة اطلع بكيكه جديدة و هدايا للصغار

بس ها المرة الفترة الجاية مرة ضغط عليّ  عندي مليون شغلة لازم اسويها واسلمها بعد العيد + ان الافكار عندي نفذت

ها الايام رسمت لي جدول للي لازم انجزه مع نهايه الاجازة عشان التسليم و طريقة سير البرنامج حقي ..

بقي الان

حفلة العيد و الهدايا و الكيكة

في الغالب الكيكة ما تطلع فكرتها الا ليلة العيد يبدا الهبال  و الابداع و ان شاركني الشيف” حمادي ” الكيكة فعليها السلام مب طالع منها الا فن يدينه الجميلة

الله يستر ولا يشاركني يارب ينام ولا يشوف له صرفه ذيك الليله عشان اقدر اشتغل لان مسبب لي ازمه ولا اقدر اكرشه لو اكرشه كرشتني امي بداله

الهدايا مفروض اني ابدا في تجهيزها الان

امم

المشكلة ان الهدايا استنفذت كل افكاري في الاعياد السابقة  بجميع الفكر و الفوكرات و الان لازم اخترع حاجه جديده و مضروبه في 5 ( ثلاث بنات و ولدين )

و المشكلة الاخرى اعمارهم  8 – 6 -6 -3 -2  ,  و الادهى لو بعطي الصغار شي و الكبار شي طارت عيونهم و ان عطيت البنات شي يختلف عن العيال طارت عيونهم

( شرت امي قبل فترة هدايا لهم  عرايس للبنات و سيارات للعيال  و بغوا عيالنا ينهبلون لين شرينا لهم عرايس !! )

طيب وش السواه فيكم يا كائنات !!

سابقا كنت اتفنن في علب الهدايا مره كيس مره علبه و كلها شغل يدي عشان تطلع حسب المزاج و بصراحه اكثر من يقدرها امهاتهم   اما هم الله يخلف حدهم يطلعون الحلاو الي وسطها ثم ينسون وش شكلها حتى ههه هذا اذا ما لقيتها اخر اليوم مفعوصه  ( يا حسافة شغل يوم ولا يومين كاملة  ! )

امم فكرت في

سمك

اشتري لهم سمك بما ان كل واحد منهم يحاشرني في سمكاتي سابقا و كل ما شافوا خشتي قالوا ” ياسمين لرحتي تشترين سمكة  اشتري لنا سمكات معك ” و من هذا المنطلق فكرت اشتري لهم قولدن فشات تموت بعد يومين خخخخخ

لكن الامهات ترجوني ما افكر في ها الفكرة ابد مع انها مره خاااااشة مزاجي ..

حلاو

انا حامت كبدي من الحلاو لان اصلا احنا نحط كمية خرافيه من الحلاو باشكال والوان .. ( مع اني اشك انها تفرق معهم اهم شي حلاو و حلويات و مفسدات )

اكواب عليها صورهم

مب شينة صراحة لكن ما اظن عندي صور للجميع مب متاكده  + اخاف الوقت حاليا ماعاد يكفي للمحلات يسونها )

عدة مدرسية

فكرت امس وانا اصلح الفطور اشتري لهم عدة مدرسية شنطة و ملحقاتها لكل واحد منهم مع اني احسها بتكلفني ميزانيه محترمه خخخخخخخ لانهم 5 و شنط زينة و محتويات تتبعها مدري كم بوصل ..

.

.

تجهيز الحفلة هالسنة ارحم لان اختصرنا على انفسنا استأجار النطيطة و شرينا نطيطة كبيرة لهم

بس ما نطلعها الا بالمناسبات عشان يحسون بطعمها + نفافيخ و بلونات و فشافيش و كل المفسدات و يتبعها الاكواب و الصحون الملونة ..

فـ يبدو الجزء هذا مقدور عليه ان شاء الله  .. مع اني ودي اشتري اسطوانة غاز حق البالونات  احسها بتطلع حلوة مرتفعه ..

كمان هالسنة بضيف تلوين الوجه ضمن الحفلة لان اختي شاريه كمية كبيرة من الوان الوجه حق الحفلات …

.

الثلاثاء و الأربعاء هذي وخلال الاسبوع هذا عندنا حالات طوارئ وحدة من حريم إخواني عندها اختبارات ترم صيفي الله يرفقها ويعينها

المشكلة ان عندها نونو صغيرون (٧ شهور) وهزا الكائن لسانه طويل اذا صاح هههه هبل في أمي ايام الاختبارات الترم الماضي
مشكلته الابديه اذا بغا امه ماعاد راح يسكت لو بنجيب له القمر خخخخخخخخ
ولا يرضع رضاعة
ويعرف ان هذي امه حتى لو هي متغطيه
فالان
عندها يومين اختبار مدتها ساعتين ساعتين يحتاج احد ينتبه له في الصباح الين ترجع
و قررت اكون المتطوع لان البقية مشغولين ورآهم تصليح فطور خخخ مع أني ما ادبر بهاالصنف من الكائنات شي الي في هالعمر
الموضوع كله ساعتين بتتدبر ان شاء الله
اول يوم
استلاما المدعو الساعة ٩:٣٠ صباحا وكان صاحي و مصحصح خخخخخخخخ بس اكدت لي امه انه راح ينام و تاملت خير
بعد ماقعدت أنا وياه لحالنا ماصلح له الوضع “ولدنا اجتماعي خخخ ” يبي احد غير خشتي يناظره للمشكله كل البيت نائمين وش اسوي بك وانزل اتمشى به “هالكائنات تحب احد يتمشى بها و ماتطفش منه و تطلب المزيد و المزيد منه”
الله يعين لتصير واتمشى به واهو يتلفت يبحث عن اهل البيت خخخخخخخخ لكن البيت خاوي الساعة ١٠ صباحا الكل في نوم عميق
شوي بقينا عزوز افندي صاحي كان يلعب اون لاين و يكلم ربعه لكن مو مشكله اهم شي شخص ثالث استغرقت جلستنا عنده ربع ساعه ثم طفش من عزوز الحين المشي مشينا و تعبت منه قررت اسدحه جنبي يمكن ربي يهديه و ينام لانه كان يتثاوووب بس لا حياه لمن تنادي مافيش نوووم والحل ؟ قدامنا ساعتين أنا وياك لازم تلاقي صرفه لنفسك يالاخو
اووووء. ااااء واااااااء
للأسف مدري وش تبي لأني ما افهم كلامك ياتكلم صح ولا اسكت خخخخخخخخ
أمم يبي لك جهاز يترجم الاوااات حقاتك من يدري يمكن يبي ماء او شي دامه ماعلى الصوت فهو شي مبشر بخير انه ما يطلب امه (لان هذا الطلب صعب)
طيب شرايك تلعب معي angry birdsخخخخ كل مبزرة البيت يحبووونها بشغف
انسدحت جنبه وشغلتها و حطيت الشاشة قدامه و اهو مركز معها ” خطه جيدة” بس مادام الصبر الحمد لله جا ابوه قال اخليه عندك قلت لا خذه شوي ينكن ينام معك
توهم طالعين من غرفتي الا اشوف زوجة اخوي الكبير قالت نام ؟ قلت لا ولا في الأحلام فيه نوم بس يقاوم قالت هاتيه انومه
جبته لها و جبت المهاد على امل ينام لما رجعت لقيته جالس ع الارض واهي تناظر فيه
اجل فاز عليك ؟
قالت ايه توه فيه طاقه خليه يلعب وبينام
طيب طيب
واقعد احوسه شوي البسه قبعه و اشغل له لعبه بعدين سوت له زوجه اخوي اكل ولما اكل نام كانت الساعة ١١:١٥ تقريبا
أستلمته و حطيته بسريره عندي و نام القمر بسلام p-:
( صدق الأمهات يعرفون يتعاملون بصبر مع هالكائنات و يفهمون وش يبون و يشخصون الحالة )
عاد لما جات ١١:٤٥ وصلت امه بسلام و اول ما سمع صوتها فتح عيونه وقال ااووو اوووء
يله استلمي ولدك و بكره موعدنا.
اليوم الأربعاء الساعة ٩:٠٠ صباحا استلمت المدعو بس الحمد لله كان نايم
الحمد لله الأوضاع مستقره حتى الان الساعة ١١:٤٥ و اهو نايم بامان هههه وامه على وشك تجي

الحمد لله تمت المهمة بسلام
صور العصفور النائم في العش

اكره روحة السوق

و اكره اللف فيه خاصه اذا ما فيه شي ادور عليه

خطتي ها السنة تقتضي اني اشتري ملابس العيد قبل رمضان عشان لجا رمضان ما اروح معهم لطلعوا لاني اعرف بيتمد المشي بالسوق من ساعتين الى 4 ساعات ( ادري اهلي ارحم من غيرهم الي يطلعون من 4 العصر ويرجعون 12 الليل ) ..

لكن اطفش ، امل ظهري ينكسر من المشي ـ رجولي تعورني ، كتفي ينخرع من الاكياس و الشنطة

اوف

و لهذا كانت خطتي محكمة التنفيذ ،  شريت كل شي في اول ” دوري اسواق ” قبل رمضان عشان لجا ” دوري اسواق رمضان “  برمضان اقولهم لا و الله مابي اروح للسوق عندي اغراضي كاملة

ولكن للاسف مازلت الشخص المرافق ..

اختي بتروح بروح معها

مرت اخوي بتروح بروح معها

اي شخص بيروح و يبي احد ياخذ ياسمين لانها فاضيه هههههههه او لانها مب متحمله المبزره ، او لانهم مب دالين المكان و انا الدليل البشري او ” قارمن ” مثل ما يسميني عزوز

ادري انه مب غصب بس شينه اخليهم يروحون لحالهم و اهم محتاجيني

و اروح و امري لله اتمشى بس بعض الاحيان اطفش، ممكن توصل مرحلة اتمقل في المحل لين اشخله

او امشي وفجاه اكتشف ان اهلي بعييييييد ورا مره وانا ابعدت هههههه

او يدخلون محل من وراي و ما انتبهت لهم لاني امشي قدام

او استلم لي اول درج جنب محل واقعد عليه

احب محلات الجزم لان فيها كراسي دايما هههههههههههههه اول ما ادخل اجلس

احب محلات الاثاث لان فيها اثاث كثير اقدر اقعد عليه هههههه طاولة كرسي كنب سرير اي شي يمشي الحال .. هههههه

.

قبل رمضان باسبوع كنا رايحين في الصبح لمحلات تفصيل مطابخ و ندخل من محل و نطلع بمحل

اخر محل استقروا اهلي عليه

اكتشفت ان فيه واير ليس مفتوحه بالمنطقه حقته شكلها من الشقق الي فوق المحل

المهم و امشي الين صارت الاشاره كويسه بس وين ؟؟

بزاوية في المحل واقعد عندها فيها تكييف رهيب + واير ليس ههههههههه

و كل ما كلمتني اختي قالت ياسمين يصلح ذا قلت ايه ايه مدري وشو بصراحه بس مابي اوجع راسي

لاني بالاخير مب مختارين الي بقوله و اصلا انا ما افتيهم في حركات المطابخ و دواليبها شي

هم ابخص !

..

.

لي الان 4 ايام ورا بعض اطلع معهم للسوق بعد التراويح و نرجع على 12 او 1

و مع هذا ما خلصوا اغراضهم ..

و المفروض اني استغل ها الطلعات في تجهيز هدايا العيد الي ما جهزتها

..

الله يعين

لي يومين ما شفت فطور اهلي ولا حضرته و السبب اني ما انام الصبح و اروح مواصله للداوم ثم ارجع ما افرق بين الارض و السماء و انام نومه اهل الكهف

الله يعين ..

مرات افكر هل المبرمج ساحر بنظر الناس خخخخخخ هو مشكلته مسكين ما يقدرون جهوده فالكل يتخيل ان الموضوع اقل من بسيط ..

ترن ترن و يصير كل شي تحول للمطلوب

او ممكن نستخدم العصا السحرية و نقول ابرا كدابرا  تحولوا ههههههههههههه

او ممكن نصير ديبو تنين الأمنيات و نفتح السحاب ونطلع الهدايا

او اخر مثال جميل الجني الازرق الي في مصباح علاء الدين  بس “ان لمتد ادشن”

.

و ان كنت ابدو سريعه في انجاز عملي و لكن بعض الاحيان احتاج للايحاء ، و السكون و هذه هي المشكلة

فلا استطيع الحصول عليها دائما و اعتبرها نقطة ضعف

لكن لا باس فالعمل يحتاج انجاز و نتكيف مع الوقت

المشكلة لاتكمن هنا

تكمن في التعامل مع العميل ثم العميل ثم العميل

صبري ينفذ بسرعة و ان كنت صبورة لكن لا تتوقع مني الاخذ و العطاء مع اي عميل لا يريد ان يفهم غير طلباته ولا يتفهم الوضع الذي حوله

مثلا

قبل امس

كان عندي تسليم اولي لتصميم موقع

انفجعت بشدة لما اكتشفت ان صاحب التصميم فهم ان هذا الموقع انتهى !!

تداا

( الي ابي افهمه بس وش له ما اوريك الموقع بدل ما اوريك برنت سكرين مع العلم اني عدت و زدت في الموضوع .)

اليوم قررت اعيد شرح الصورة بس عشان يصير الكل فاهم اني ما خلصت توني في خطوة أ

كان المثال بسيط

انت بتنبي بيت

تحتاج بلو برنت و شكل ثلاثي ابعاد لواجهة المنزل صح ؟

تمام هذا هو الخطوة الي وريتك

ننتقل بعدها

البيت الحين يحتاج لبناء  بلوك و اساس و خرسان وو

تمام

صح

طيب انا الان هذي خطوتي الثانية بالموقع راح اصير عامل البناء الي يبني الموقع

و هذا يعني انه في ارض الواقع لو كان عندك بيت في ها المرحلة ما تشتري اثاث خلال ها المرحلة ممكن تتشوف بس ما تشتري !

تمام ؟

طيب لان

بعدها الخطوة الجاية التشطيب

ثم التاثيث

التاثيث في مثالنا السابق هو نفسه ادخال بيانات الموقع

يعني استحاله ندخل بيانات قبل ما نبني لنا موقع

لان ما عندنا شي بندخل فيه البيانات

- الان اتضحت الصورة – و خطوات الساحر المبهمة

و ان كان فيها شوي خفايا لكن ان شاء الله انها وصلت لهم

عاد اختي لما قلت لها

قالت ايه انتي اصلا ديبو